Buddion ar gyfer cyn-bartneriaid

Os bydd arnoch angen inni ddarparu ffigurau neu wybodaeth am fuddion, ffoniwch, anfonwch e-bost neu ysgrifennwch atom. Bydd angen i chi roi’r wybodaeth ganlynol i ni:

• Eich enw
• Eich rhif yswiriant gwladol
• Gofynnwch am werth trosglwyddo at ddibenion ysgariad neu ddiddymu partneriaeth sifil

Dylech wneud hynny gan fod sawl gwahanol fath o werth trosglwyddo: fe’u cyfrifwn yn wahanol at ddibenion ysgariad nag ar gyfer trosglwyddo eich pensiwn i gynllun pensiwn arall. Mae’n rhaid inni sicrhau ein bod ni’n rhoi’r un iawn i chi.

Dylech gael y gwerth trosglwyddo ymhen tri mis ar ôl gofyn amdano. Weithiau mae’n cymryd cyn hired â hynny gan fod angen i ni gasglu gwybodaeth gan Gyllid a Thollau, er enghraifft, neu’ch cyn-gyngor. Ni allwn gyfrifo’r gwerth trosglwyddo ond ar ôl derbyn yr holl wybodaeth hon.

Byddwn ond yn rhoi un gwerth trosglwyddo am ddim bob blwyddyn. Codir tâl am geisiadau ychwanegol a wnewch o fewn yr un cyfnod o 12 mis. Am fanylion o bryd y byddwn yn codi tâl, gweler ein Atodlen daliadau – rhannu pensiwn wrth ysgaru

Gall y Llys rannu eich pensiwn, naill ai drwy Orchymyn Rhannu Pensiwn neu Orchymyn Clustnodi.

Mae Gorchymyn Rhannu Pensiwn yn rhannu eich pensiwn pan fyddwch chi’n ysgaru neu pan ddiddymir eich partneriaeth sifil, ac felly’n torri’r cysylltiad yn llwyr. Bydd eich cyn-bartner yn cael ‘credyd pensiwn’; hynny yw, cyfran o’r buddion pensiwn yr ydych chi wedi’u cronni. Bydd credyd pensiwn eich cyn-bartner yn eiddo iddynt hwy eu hunain. Bydd yn gwbl ar wahân i’ch buddion chi sy’n weddill.

Fe all eich cyn-bartner drosglwyddo eu credyd pensiwn allan i gynllun pensiwn arall neu fe allant ddechrau tynnu’r pensiwn hwn unrhyw bryd ar ôl troi’n 55 oed, pan fydd yn daladwy am oes.

Mae Llywodraeth y DU wedi cyhoeddi y bydd yr oed cynharaf y gall aelod credyd pensiwn dynnu eu pensiwn yn cynyddu o 55 oed i 57 oed o 6 Ebrill 2028.

Fe allent gael eu gwarchod rhag y cynnydd hwn os wnaethant ymuno â’r CPLlL yng Nghymru a Lloegr cyn 4 Tachwedd 2021. Fodd bynnag, dim ond pan fyddant yn tynnu eu pensiwn CPLlL y byddant yn cael eu gwarchod, os yw rheolau’r Cynllun yn caniatáu iddynt gymryd eu pensiwn cyn troi’n 57 oed.

Llywodraeth y DU sy’n gosod rheolau Cynllun Pensiwn Llywodraeth Leol. Nid yw wedi ei gadarnhau eto os bydd yn caniatáu i aelodau, sy’n gymwys i gael eu gwarchod, gymryd eu pensiwn CPLlL cyn eu bod yn 57 mlwydd oed o 6 Ebrill 2028.

Dan Orchymyn Clustnodi fe delir rhan o’ch buddion i’ch cyn-bartner pan fyddwch chi’n dechrau cael eich pensiwn Cynghorydd drwy’r Cynllun Pensiwn Llywodraeth Leol. Gall eich cyn-bartner naill ai gael cyfandaliad neu gyfran o’ch incwm pensiwn rheolaidd. Daw’r taliad hwn i ben wedyn pan fyddwch chi’n marw neu os bydd eich cyn-bartner chi’n ailbriodi neu’n ffurfio partneriaeth sifil newydd.

• Ni fydd eich cyn-bartner yn gymwys i gael pensiwn partner sy’n goroesi os byddwch chi’n marw o’u blaenau nhw.
• Bydd pensiynau plant yn dal yn daladwy. Nid yw ysgaru neu ddiddymu partneriaeth sifil yn effeithio ar y rhain.
• Pan rennir eich pensiwn er mwyn rhoi rhan ohono i’ch cyn-bartner, gelwir y rhan a ddidynnir o’ch pensiwn yn ddebyd pensiwn.

Cofiwch efallai y byddwch chi’n dymuno newid eich ffurflen Mynegi Dymuniad a diwygio eich rhestr o fuddiolwyr ar ôl ysgaru neu ddiddymu partneriaeth sifil.

Sylwer, fodd bynnag, os bydd y Llys yn cyhoeddi Gorchymyn Clustnodi, y gall ddyfarnu y dylai rhywfaint o’r grant neu’r grant i gyd fynd i’ch cyn-bartner os byddwch chi’n marw o’u blaenau nhw.

Os cyflwynir Gorchymyn Rhannu Pensiwn ar gyfer eich pensiwn Cynghorydd drwy’r Cynllun Pensiwn Llywodraeth Leol, bydd unrhyw bensiwn goroeswr sy’n daladwy yn lleihau os byddwch chi’n marw o’u blaenau nhw. Mae hyn oherwydd bod rhannu pensiwn wedi lleihau gwerth eich pensiwn. Bydd hyn yn cael effaith ar werth pensiwn eich partner presennol hefyd.

Os byddwch chi’n ailbriodi neu’n ffurfio partneriaeth sifil newydd a bod y berthynas honno’n dod i ben, gall y Llys gyhoeddi Gorchymyn Rhannu Pensiwn neu Orchymyn Clustnodi arall ar gyfer eich pensiwn Cynghorydd sy’n weddill yn y Cynllun Pensiwn Llywodraeth Leol.

Nid yw’n bosibl rhoi Gorchymyn Rhannu Pensiwn arall, fodd bynnag, os oes Gorchymyn Clustnodi sydd eisoes yn berthnasol i’ch pensiwn Cynghorydd yn y Cynllun Pensiwn Llywodraeth Leol.